Umur rərə şedə, odəm pi bəbe.

✍️ Super Admin 📅 02.11.2026 👁️ 108 baxış
Umur rərə şedə, odəm pi bəbe.

Qıləy ğarze, yodo bekay nibəbe,

Umur rərə şedə, odəm pi bəbe,

Bınvıştom ım şeyri, peşı di bəbe,

Ğədimo Andurmə qemji lonəye,

Vıyo jiye ıştən yolə hınəye.


Ha ruj jıqoy, ruji kuti ə şəve,

Con nığodə boştə coni bırəve,

Hejo mənışt, qiləy beşi bə nəve,

Səyxanımi hali səyku pevaştiy,

Qulqəzəqin, Reğnə duli ovaştiy.


Əvəsori mağıl dəkəşdə rujən,

Lınqə rizon reçə bə dimə ojən,

Dəpəjənəhali tono po bıjən,

Vığıno eqınə çı tarıxi nal,

Bo dinci səy petat de bə Kuşki hal.


Piəkujə kutisəy tık Zardəhiyon,

Imroni kaştero qit romə kiyon?,

Isə zəmni edoə, ve sırron niyon,

Heste Koləviyon, Qurkonon vıyo,

Dimbədim pemandə ıvrə de dıyo.


Bənə Verdı efırs Qırdi həmoku,

Mahast Donzəhiyon, dəvard kənoku,

Xəy bəvindeş Səydon dıvo-sənoku..,

Qəmi bəton kəku handə kulədə,

Çıvra Çayru çidə dasti dılədə.


Bı ton Tıbə Boboym, bobo ğəv çidə,

Çıvrəy bə ton Kanədiye, əv çidə,

Tıpəvıron efırs-efırs, tav çidə,

Tikəy bə je Nəzrə honi şuredə,

Çəyo quşdə, Qurə şulə nıredə.


Bə har sıxan bıvot hərcoy quş mədə,

Bə fəşəlçi, dəli dasti riş mədə,

Çı Rəstoni ovi peşom çaşmədə,

Yolon donə əjin, kenə bəvoy şığ,

Nodonon qulikay Donəjənə sığ...


Honiduli nafko kəlxoz kaşdəbe,

Dızdə molon qiləy bə hi dəşdəbe,

Kanə merdon vəyo hıvos kəşdəbe,

Nə ə merdon, nə ə hiyon mandəni,

Cohilon çəvonku hiççi zındənin...


Yolon votəy, ve bə nığıl dast məbə,

Hələ bətı jıqo ve çiy rast bəbə,

Ovardəsığisə bozon restə bə,

Komi səş dənoə bə kəşəbın, hıtə,

Komi Kulətonış eçaşi qətə.


Voqınə təpə hoy bınışt namədə,

Xıyol deəro bəşe, səmə vamədə,

Eqard bə çinqoləş həşi qamədə,

Coni dəmon Şonəy sıği qiləvo,

Əcəb klip kəşə Ruzqari vıyo.


Vıyo verə zəjon vanqış emandə,

Çiməni ətrə bu bə cuş eqındə,

Tamə bıkaş, Voəçolədə va mandə,

Hakənəy tı bəyən tamşokə pidə,

Qıləy həvuş qardə Zəqoləbədə.


Eşi saru, Huşnə keri yaniku,

Peşom biyyə ovi Yolə honiku,

Edyəsi bə jişəy Halonbıniku,

Hələ nəzə səğand bı vəyştə vıron,

Bə noşi ğıç jəydən hındılə bıron.


Əmir Klabandi ovdonə yo bə,

Dızqohalo tarıx niyon bə, to bə.

Veşo yo perəsə, çı əcəb ko bə,

Qoqovo ğədimə əmijə vırəy,

Çadoydə ğərinon hələ de qırəy...


Kınqəş vatə kafçə-kafçə dulisə,

Vəcələş bılınde hırdə kulisə,

Mərənqoy Pobırə koçi hali sə,

Jiyo Kurmə vişə, Kutinə rəğe,

Qiləy osə bığand Dudurnə sığe.


Sığlurd Çəvıxə doy purə xəzinəy,

Yolə koçi vəton Bıre, Qəzənəy,

Tulnətanqo sape beşi, ro zınəy,

Pust bə, çəkrondə ki dəbəqije, ha,

Qıldikə kuli teğ bədtər tije, ha.


Həşi qarde kuysə, soqo elıvəy,

Bə kə səbəro be, həməy pelıvəy,

Kanə riz tojəm kay, təbım olıvəy,

Qardimon ha toni, beşimon bə di,

Çı vəyştə vıronku ki bəbeki si?!


B.Veşo. 2022.


💬 Şərhlər (3)

Haci Ramazan 03.11.2026

Elimzin obamizin böyuk şairi mənim dayim Baladdin Veşo Allah sizi qorusun,kəndimizə aid butun daglarin caylarin adini dəqiqlikə qeyd edib🙏❤️

Babək 03.11.2026

"Səyxanımi hal" ya "səyqami hal " ??

Nəriman Ceferov 03.11.2026

Çox sağ ol Baləddin əmioğlu. Allah köməyiniz olsun

Şərh yaz

← Bütün köşə yazıları